Bar 3
1“‘God bilong Israel, yu Bikpela na yu strong olgeta. Ol kain kain wari i pulap long bel bilong mipela, na mipela i singaut long yu. 2Bikpela, yu mas harim mipela na marimari long mipela, long wanem, mipela i bin mekim sin long ai bilong yu. 3Yu king i save stap oltaim, tasol mipela i save dai na i save lus olgeta. 4Bikpela, yu strong olgeta, yu God bilong Israel, harim prea bilong mipela ol tumbuna pikinini bilong ol lain i bin mekim sin. Ol i bin sakim tok bilong yu, na nau mipela i karim hevi bilong sin bilong ol. 5Yu no ken tingim tumas ol rong ol tumbuna bilong mipela i bin mekim bipo. Nogat. Tingim tasol strong na gutpela nem bilong yu yet. 6Long wanem, yu God na yu Bikpela bilong mipela, na mipela bai i litimapim nem bilong yu. 7Yu save mekim mipela i pret long yu, bai mipela i mas singaut long yu. Na long dispela ples kalabus yet mipela bai i litimapim nem bilong yu, long wanem, mipela i givim baksait pinis long ol pasin nogut bilong ol tumbuna bilong mipela. 8Plis, yu ken lukluk i kam daun long mipela ol manmeri i stap kalabus. Yu bin rausim mipela i go i stap nabaut namel long ol arapela kantri, na yu bin mekim ol dispela lain i tok bilas na i tok nogut long mipela. Mipela i kisim bekim nau bilong ol rong ol tumbuna bilong mipela i bin mekim long taim ol i bikhet long yu, God, Bikpela bilong mipela.’”Tok bilong mekim ol manmeri i stap bel isi
(Sapta 3.9—5.9)
Gutpela tingting em nambawan samting tru
9Yupela a ol manmeri bilong Israel, yupela harim gut tok bilong ol lo. Ol dispela tok inap bringim yupela i go long laip bilong i stap gut oltaim. Olsem na yupela i mas putim gut yau bai yupela i kisim save. 10Bilong wanem yupela ol Israel i stap nau long graun bilong ol birua na yupela i kamap lapun pinis namel long ol? 11Bilong wanem yupela i stap doti long ai bilong God olsem bodi bilong man i dai pinis, na i luk olsem yupela yet i dai pinis? ▼▼3.11Sampela saveman i ting as bilong dispela tok i olsem. Ol Israel i stap kalabus namel long ol haiden, em ol lain i stap doti long ai bilong God. Ol Israel i save pas wantaim ol dispela lain, na ol yet i kamap doti long ai bilong God.
12Ating yupela i bin lusim God, em as bilong gutpela tingting na save. 13Sapos yupela i bin wokabaut long rot bilong em, yupela inap sindaun gut oltaim oltaim. 14Yupela i mas wok long painim as tru bilong strong na save na gutpela tingting, olsem bai yupela i ken kisim longpela laip na lait bilong soim rot long yupela na bai yupela i kisim gutpela taim.15Inap c nau husat i bin painim as ples bilong gutpela tingting? Husat i bin i go insait long bakstua bilong em? 16Ol man i bin traim pinis, ol i no moa i stap. Em hia sampela bilong ol. Ol hetman bilong ol kantri, na ol man i pilai long ranim ol wel abus na pisin long bus. Na tu ol man i save hipim planti silva na gol, long wanem, ol i save laikim tumas na wok hat tru long kisim, 18na ol man i save tumas long wokim olkain naispela bilas long silva. 19Ol dispela lain man bilong bipo, ol i go we? Ol i go pinis long ples bilong ol man i dai pinis. Na ol arapela lain i kamap na i kisim ples bilong ol.
20Wanpela yangpela lain i kamap bihain long ol na i stap long dispela graun. Tasol ol tu i no painim rot bilong gutpela tingting, na ol tu i no kamap klostu long en. 21Ol pikinini bilong ol i traim, tasol ol tu i no inap. 22Ol Kenan na ol Idom ol i wok long painim gutpela tingting. Tasol ol i no inap. 23Ol bisnisman bilong Meran na Tema i traim na ol tu i no painim rot bilong gutpela tingting. Na ol man bilong autim ol stori, na ol man i wok long painim save, ol tu i no inap.
24Ol Israel, yupela harim. Ples bilong God i no gat arere bilong en, na em i bikpela moa yet. 25I no gat pinis bilong en na i no gat wanpela inap makim longpela na op bilong en. 26Em d ples we longpela taim bipo ol i bin karim ol traipela man i gat biknem na i save tumas long pasin bilong pait. 27Tasol God i no mekim ol i kamap manmeri bilong em. Na em i no soim rot bilong gutpela tingting long ol. Nogat. 28Dispela lain manmeri i dai pinis, long wanem, ol i sot long gutpela tingting na save.
29I no gat wanpela man i bin i go antap long skai na painim gutpela tingting namel long ol klaut na bringim i kam daun. 30I no gat wanpela man i bin ran long sip na go long olgeta hap bilong solwara bilong painim gutpela tingting na baim em long gol i dia tumas. 31I no gat wanpela man inap long kamap long gutpela tingting o painim rot i go long en.
32Gutpela tingting i stap long God wanpela tasol. Em i painim long save bilong em yet. Em i mekim kamap dispela graun bai em i ken i stap oltaim, na em i putim ol kain kain animal i stap long en. 33Em i save kamapim lait na salim i go long olgeta hap. Na em i save singautim lait i kam bek, na wantu lait i harim tok bilong em. 34Em i save singautim ol sta, na kwiktaim ol i bekim tok bilong em. Ol i sanap long ples bilong ol, na ol i amamas long givim lait bilong givim biknem long God i bin mekim ol i kamap. 36Dispela em i God bilong mipela na i no gat wanpela inap long em. 37Long dispela taim gutpela tingting i kamap hia long graun na em i stap namel long yumi.
Copyright information for
TPI